ကြယ်ငါးပွင့် – ဘရာဇီးလ်ရဲ့ ကမ္ဘာ့ဖလား အောင်ပွဲတွေကို ပြန်လည် တမ်းတခြင်း

ဘရာဇီးလ် အသင်းဟာ ၁၉၅၈ ခုနှစ်ကနေ ၂၀၀၂ ခုနှစ်အတွင်း ကမ္ဘာ့ဖလား ချန်ပီယံဆုကို ငါးကြိမ်တိုင်တိုင် ဆွတ်ခူးရရှိခဲ့ပါတယ်။ ဒါဟာ တခြား ဘယ်နိုင်ငံထက်မဆို အမျိုးသား ကမ္ဘာ့ဖလား ဆုဖလား အများဆုံး ရရှိထားတဲ့ စံချိန်လည်း ဖြစ်ပါတယ်။ ဒါကြောင့် အခု တစ်ခါမှာတော့ ဘရာဇီးလ် အသင်း အောင်ပွဲခံနိုင်ခဲ့တဲ့ ဒီကမ္ဘာ့ဖလား ပြိုင်ပွဲ ငါးကြိမ်စလုံးရဲ့ နောက်ကွယ်က စိတ်ဝင်စားဖွယ် အချက်အလက်တွေကို ပြန်လည် သုံးသပ် ဖော်ပြပေးလိုက်ပါတယ်။

 

ဘရာဇီးလ် အသင်းရဲ့ ကမ္ဘာ့ဖလား အောင်မြင်မှု မှတ်တမ်း

• ၁၉၅၈ ခုနှစ် – ဆွီဒင် နိုင်ငံမှာ ကျင်းပတဲ့ ကမ္ဘာ့ဖလား ချန်ပီယံ
• ၁၉၆၂ ခုနှစ် – ချီလီနိုင်ငံမှာ ကျင်းပတဲ့ ကမ္ဘာ့ဖလား ချန်ပီယံ
• ၁၉၇၀ ပြည့်နှစ် – မက္ကဆီကိုနိုင်ငံမှာ ကျင်းပတဲ့ ကမ္ဘာ့ဖလား ချန်ပီယံ
• ၁၉၉၄ ခုနှစ် – အမေရိကန်ပြည်ထောင်စုမှာ ကျင်းပတဲ့ ကမ္ဘာ့ဖလား ချန်ပီယံ
• ၂၀၀၂ ခုနှစ် – ကိုရီးယားနဲ့ ဂျပန်နိုင်ငံတို့မှာ ကျင်းပတဲ့ ကမ္ဘာ့ဖလား ချန်ပီယံ

 

၁၉၅၈ ခုနှစ် – ပီလီကို ကမ္ဘာကြီးနဲ့ စတင်မိတ်ဆက်ခြင်း

၁၉၅၈ ခုနှစ် ကမ္ဘာ့ဖလား ပြိုင်ပွဲဟာ ဘရာဇီးလ် အတွက် သူတို့ရဲ့ ပထမဆုံး ကမ္ဘာ့ဖလား ချန်ပီယံဆုကို ဆွတ်ခူးနိုင်ခဲ့တဲ့ ပြိုင်ပွဲဖြစ်ပြီး ဗိုလ်လုပွဲမှာ အိမ်ရှင် ဆွီဒင်ကို ၅-၂ နဲ့ ဂိုးပြတ်အနိုင်ရခဲ့တာ ဖြစ်ပါတယ်။ ဒီပြိုင်ပွဲမှာ ပြင်သစ် တိုက်စစ်မှူး ဂျတ် ဖွန်တိန်းက ပြိုင်ပွဲ တစ်ခု အတွင်း ဂိုးသွင်း အများဆုံး စံချိန် အဖြစ် သမိုင်းဝင် ၁၃ ဂိုးအထိ သွင်းယူခဲ့ပေမယ့် သတင်းစာမျက်နှာတွေရဲ့ ခေါင်းကြီးပိုင်းကို စိုးမိုးသွားခဲ့တာ ကတော့ ဘရာဇီးလ် လူငယ်လေး ‘ပီလီ’ ပဲ ဖြစ်ပါတယ်။

ကမ္ဘာ့ဖလား သမိုင်းတစ်လျှောက် ပီလီ စိုက်ထူခဲ့တဲ့ လူငယ်စံချိန်တွေ ကတော့ အသက်အငယ်ဆုံး ဂိုးသွင်းရှင် (ကွာတားဖိုင်နယ် ဝေးလ်စ်နဲ့ ပွဲတွင်မှာ အသက် ၁၇ နှစ်၊ ၂၃၉ ရက်နဲ့ တစ်လုံးတည်းသော အနိုင်ဂိုးကို သွင်းယူခဲ့ကာ လက်ရှိအချိန်အထိ ဘယ်သူမှ မချိုးဖျက်နိုင်သေးပါဘူး)၊ အသက်အငယ်ဆုံး ဟက်ထရစ်ရှင် (ဆီမီးဖိုင်နယ် ပြင်သစ် အသင်းနဲ့ ပွဲမှာ အသက် ၁၇ နှစ်နှင့် ၂၄၄ ရက်နဲ့ ဟက်ထရစ် သွင်းယူခဲ့ပါတယ်)၊ အသက်အငယ်ဆုံး ဗိုလ်လုပွဲ ဂိုးသွင်းရှင် (အိမ်ရှင် ဆွီဒင်နဲ့ ဗိုလ်လုပွဲမှာ အသက် ၁၇ နှစ်၊ ၂၄၉ ရက်နဲ့ ၂ ဂိုး သွင်းယူခဲ့ပြီး အသက် ၁၉ နှစ်အောက်နဲ့ ကမ္ဘာ့ဖလား ဗိုလ်လုပွဲမှာ ဂိုးသွင်းနိုင်တဲ့ တစ်ဦးတည်းသော ကစားသမား ဖြစ်လာခဲ့ပါတယ်)

ဒီပြိုင်ပွဲရဲ့ အကောင်းဆုံး လူငယ်ကစားသမားဆုကို ရရှိခဲ့ပြီးနောက် ပီလီ တစ်ယောက် အနာဂတ် ကမ္ဘာ့ဖလား ပြိုင်ပွဲတွေမှာ ဘယ်လိုတွေ ထပ်မံ ခြေစွမ်းပြဦးမလဲ ဆိုတာကို တစ်ကမ္ဘာလုံးက စောင့်ကြည့်ရမယ့်သူ ဖြစ်လာခဲ့ပါတယ်။

 

၁၉၆၂ ခုနှစ် – နှစ်ကြိမ်ဆက် ချန်ပီယံ 

လွန်ခဲ့တဲ့ ၄ နှစ်ကနဲ့ မတူဘဲ ၁၉၆၂ ခုနှစ် ကမ္ဘာ့ဖလား ပြိုင်ပွဲကို ရောက်လာတဲ့အခါ မှာတော့ ပီလီဟာ ကမ္ဘာ့အကောင်းဆုံး ဘောလုံးသမား အဖြစ် အားလုံးရဲ့ အသိအမှတ်ပြုခြင်းကို ခံနေရပါပြီ။ ဒါပေမယ့် ပြီးခဲ့တဲ့ ၄ နှစ်ကနဲ့ ထပ်ပြီး မတူညီတာ တစ်ခု ကတော့ ဘရာဇီးလ် အသင်း ဒုတိယအကြိမ် ကမ္ဘာ့ဖလားကို ဆက်တိုက်ဆွတ်ခူးတဲ့ အချိန်မှာ ပီလီ တစ်ယောက် ကွင်းဘေး ကနေပဲ ထိုင်ကြည့်နေခဲ့ရတာ ဖြစ်ပါတယ်။ ဒီဘရာဇီးလ် ကြယ်ပွင့်ဟာ မက္ကဆီကိုနဲ့ ကစားခဲ့တဲ့ အဖွင့် ပွဲစဉ်မှာပဲ ဂိုးသွင်း၊ ဂိုးဖန်တီးမှုတွေ လုပ်ပြီး ခြေစွမ်းပြခဲ့ပေမယ့် ဒုတိယမြောက် ကစားရတဲ့ ချက်ကိုစလိုဗက်ကီးယားနဲ့ ပွဲစဉ်မှာ ဒဏ်ရာရရှိသွားခဲ့တာကြောင့် ပြိုင်ပွဲ ပြီးဆုံးတဲ့ အထိ ထပ်မံ ကစားခွင့် မရတော့ပါဘူး။

ဒါပေမဲ့ ဘရာဇီးလ် အသင်း ဂါရင်ချာနဲ့ ဗာဗာ တို့က တစ်ယောက်ကို ၄ ဂိုးစီ သွင်းယူပေးခဲ့ပြီး ဒီသွင်းဂိုး ၈ ဂိုးရဲ့ အကူအညီနဲ့ ဘရာဇီးလ် အသင်းကို ၁၉၆၂ ခုနှစ်ရဲ့ ချန်ပီယံ ဖြစ်အောင် တွန်းပို့ပေးနိုင်ခဲ့ပါတယ်။ ဒါဟာ ကမ္ဘာ့ဖလား သမိုင်းမှာ ၂ ကြိမ် ဆက်တိုက် နောက်ဆုံး ရရှိခဲ့တဲ့ အသင်း အဖြစ် စံချိန်တင်သွားစေခဲ့တာ ဖြစ်ပါတယ်။ ချက်ကိုစလိုဗက်ကီးယားနဲ့ ကစားခဲ့တဲ့ ဗိုလ်လုပွဲမှာ ဦးဆောင်ဂိုး အသွင်းခံခဲ့ရပေမယ့် အမရီလ်ဒို၊ ဇီတိုနဲ့ ဗာဗာ တို့ရဲ့ သွင်းဂိုးတွေကြောင့် ၃-၁ နဲ့ အနိုင်ရရှိကာ ချန်ပီယံ ဖလားကို သိမ်းပိုက်နိုင်ခဲ့ပါတယ်။

 

၁၉၇၀ ပြည့်နှစ် – သမိုင်းတစ်လျှောက် အကောင်းဆုံး ဘောလုံးအသင်း

၁၉၇၀ ပြည့်နှစ် ဘရာဇီးလ် အသင်း ကတော့ တကယ့်ကို ထူးခြားပြောင်မြောက်တဲ့ အသင်းပါ။ သူတို့ဟာ မက္ကဆီကို ကမ္ဘာ့ဖလား ပြိုင်ပွဲကို မလာခင် ခြေစစ်ပွဲ ၆ ပွဲစလုံး အနိုင်ရခဲ့သလို၊ ကမ္ဘာ့ဖလား ပြိုင်ပွဲကြီး အတွင်း ကစားခဲ့တဲ့ ပွဲစဉ်တိုင်းကို ရာနှုန်းပြည့် အနိုင်ရရှိခဲ့ပါတယ်။ ဒါဟာ ၁၉၃၀ ပြည့်လွန်နှစ်တွေ နောက်ပိုင်း ကမ္ဘာ့ဖလား ပြိုင်ပွဲ တစ်ခုလုံးမှာ ပွဲတိုင်းနိုင်ပြီး ချန်ပီယံ ဖြစ်ခဲ့တဲ့ တစ်ခုတည်းသော နိုင်ငံ အဖြစ် မှတ်တမ်းဝင်ခဲ့ပါတယ်။

နည်းပြ မာရီယို ဇာဂါလိုဟာ ကစားသမားဘဝ (၁၉၅၈ နှင့် ၁၉၆၂) နဲ့ လည်းကောင်း၊ နည်းပြဘဝနဲ့ လည်းကောင်း ကမ္ဘာ့ဖလားကို ဆွတ်ခူးနိုင်ခဲ့တဲ့ ပထမဆုံးသော ကစားသမား ဖြစ်လာခဲ့ပါတယ်။ သူ့ရဲ့ အဓိက တိုက်စစ်မှူး ဂျာဇင်ဟို ဟာလည်း ကစားခဲ့တဲ့ ပွဲစဉ် ၆ ပွဲစလုံးမှာ ဂိုးသွင်းယူနိုင်ခဲ့ပြီး၊ ယနေ့ ထက်တိုင် ကမ္ဘာ့ဖလား ပြိုင်ပွဲ တစ်ခုရဲ့ ပွဲစဉ်တိုင်းမှာ ဂိုးသွင်းပြီး ချန်ပီယံ ဖြစ်ခဲ့တဲ့ တစ်ဦးတည်းသော ကစားသမား အဖြစ် စံချိန်တင်ထားဆဲ ဖြစ်ပါတယ်။ ဂျာဇင်ဟိုက ဂိုးသွင်းစံချိန်တွေကြောင့် ချီးကျူးခံခဲ့ရပေမယ့် ပီလီကလည်း ဘရာဇီးလ် အသင်းရဲ့ အောင်မြင်မှု အတွက် အဓိကကျတဲ့ နေရာက ပါဝင်ခဲ့ပါတယ်။ ဒီပြိုင်ပွဲမှာလည်း ပီလီက စွမ်းဆောင်ရည်ကောင်းတွေ ပြသပြီး စံချိန်သစ်တွေ တင်နိုင်ခဲ့ပါတယ်။

ဒီအောင်ပွဲဟာ ဘရာဇီးလ် အတွက် တတိယမြောက် ကမ္ဘာ့ဖလား အောင်မြင်မှု ဖြစ်တာကြောင့် ကမ္ဘာ့ဘောလုံးအဖွဲ့ချုပ်က ကမ္ဘာ့ဖလား မူလဖလားကြီး ဖြစ်တဲ့ Jules Rimet Trophy ကို ဘရာဇီးလ် အသင်းအား အပိုင်သိမ်းပိုက်ခွင့် ပေးခဲ့ပြီး နောက်ထပ် ဖလား အသစ် တစ်ခုကို ပြန်လည် ပြုလုပ်ခဲ့ရပါတယ်။

 

၁၉၉၄ ခုနှစ် – ပင်နယ်တီ အဆုံးအဖြတ်

၁၉၉၄ ခုနှစ် အမေရိကန်ပြည်ထောင်စုမှာ ကျင်းပတဲ့ ကမ္ဘာ့ဖလား ဗိုလ်လုပွဲမှာ ဘရာဇီးလ် အသင်းဟာ အီတလီ အသင်းကို ပင်နယ်တီ အဆုံးအဖြတ်နဲ့ အနိုင်ရရှိခဲ့ပြီး ၂၄ နှစ်ကြာ စောင့်ဆိုင်းခဲ့ရတဲ့ ကမ္ဘာ့ဖလား ချန်ပီယံဆုကို ပြန်လည် ဆွတ်ခူးနိုင်ခဲ့ပါတယ်။ ဒါဟာ ဆီမီးဖိုင်နယ် အဆင့် ကိုတောင် မတက်နိုင်ခဲ့တဲ့ ကမ္ဘာ့ဖလားပြိုင်ပွဲ ငါးကြိမ်စာ စိတ်ပျက်စရာတွေကို အဆုံးသတ်ပြီး သူတို့ရဲ့ စတုတ္ထမြောက် ကမ္ဘာ့ဖလားကို သိမ်းပိုက်နိုင်ခဲ့တာ ဖြစ်ပါတယ်။

အရပ်ပုပေမယ့်လည်း ခြေစွမ်းထက်မြက်တဲ့ တိုက်စစ်မှူး ရိုမာရီယို (၅ ဂိုး) နဲ့ သူ့ရဲ့ တွဲဖက် တိုက်စစ်မှူး ဘီဘီတို (၃ ဂိုး) တို့ဟာ ဘရာဇီးလ်ကို ဗိုလ်လုပွဲအထိ ပို့ဆောင်ပေးနိုင်ခဲ့ပေမယ့် ဗိုလ်လုပွဲ မှာတော့ အီတလီ အသင်းရဲ့ အတွေ့အကြုံရင့် ခံစစ် ကျောက်ဆောင်ကို မိနစ် ၉၀ နဲ့ အချိန်ပိုတွေမှာပါ ကျော်ဖြတ်နိုင်ခြင်း မရှိခဲ့ပါဘူး။

ပြိုင်ပွဲ တစ်ခုလုံးရဲ့ ဖျော်ဖြေမှု အပိုင်းအရ ကြည့်ရင်တော့ ဂိုးမရှိသရေ (၀-၀) နဲ့ ပြီးဆုံးခဲ့တဲ့ ဒီဗိုလ်လုပွဲဟာ သမိုင်းမှာ စိတ်ပျက်စရာ အကောင်းဆုံး ဗိုလ်လုပွဲ တစ်ခု အဖြစ် သတ်မှတ်ခြင်း ခံခဲ့ရပေမယ့်၊ ပင်နယ်တီ အဆုံးအဖြတ် မှာတော့ အီတလီ အသင်းရဲ့ ဝါရင့်ကစားသမားကြီး ရော်ဘာတို ဘက်ဂျီယိုရဲ့ နာမည်ကျော် ပင်နယ်တီ လွဲချော်မှုကြောင့် ဘရာဇီးလ် အသင်းက ၃-၂ နဲ့ အနိုင်ရရှိသွားခဲ့ပါတယ်။ ဒါဟာ ကမ္ဘာ့ဖလား သမိုင်းမှာ ဗိုလ်လုပွဲကို ပင်နယ်တီနဲ့ ပထမဆုံးအကြိမ် အဆုံးအဖြတ်ပေးခဲ့တာ ဖြစ်ပါတယ်။ ဒီ ၁၉၉၄ ဘရာဇီးလ် အသင်းဟာ ဂိုးတွေ အများကြီး သွင်းယူနိုင်ခဲ့တဲ့ အသင်း မဟုတ်သလို၊ ခံစစ်ပိုင်း ကလည်း ပေးဂိုးတွေ အများကြီး မရှိခဲ့ပါဘူး။ 

 

၂၀၀၂ ခုနှစ် – R9 ရဲ့ အချိန်အခါ

၁၉၉၈ ခုနှစ် ပြင်သစ် ကမ္ဘာ့ဖလား ပြိုင်ပွဲတုန်းက ဘရာဇီးလ် အသင်းဟာ ချန်ပီယံ ဖြစ်ဖို့ ရေပန်းအစားဆုံး ဖြစ်ခဲ့ပြီး သူတို့ရဲ့ ကြယ်ပွင့် တိုက်စစ်မှူး ရော်နယ်ဒို ဟာလည်း တစ်ကမ္ဘာလုံးကို ကိုင်လှုပ်မယ့်သူ အဖြစ် သတ်မှတ်ခြင်းခံခဲ့ရပါတယ်။ ဒါပေမယ့် ပြင်သစ်နဲ့ ကစားရမယ့် ဗိုလ်လုပွဲ မတိုင်ခင်မှာ ရော်နယ်ဒိုကို ပွဲထွက် လူစာရင်း ကနေ ချန်လှပ်ခဲ့ပြီးမှ ပြန်လည် ထည့်သွင်းခဲ့တဲ့ အငြင်းပွားဖွယ်ရာ ပြင်ဆင်မှုတွေကြောင့် ဘရာဇီးလ် အသင်းဟာ အိမ်ရှင် ပြင်သစ်ကို ၃-၀ နဲ့ ဂိုးပြတ် ရှုံးနိမ့်ပြီး ဒုတိယနဲ့ပဲ ကျေနပ်ခဲ့ရပါတယ်။ ရော်နယ်ဒိုဟာ အဲဒီနှစ်မှာ အကောင်းဆုံး ကစားသမားဆုကို ရရှိခဲ့ပေမယ့် ချန်ပီယံဖလားကို မကိုင်မြှောက်နိုင်ခဲ့တဲ့အတွက် စိတ်ပျက်ခဲ့ရမှာ အသေအချာပါပဲ။

လေးနှစ် အကြာ ၂၀၀၂ ခုနှစ် ကမ္ဘာ့ဖလား ပြိုင်ပွဲကို ရောက်တဲ့အခါ မှာတော့ ဘရာဇီးလ် အသင်းရော ရော်နယ်ဒိုပါ အတိတ်က အရှုံးကြွေးတွေကို ဆပ်ဖို့ အဆင်သင့် ဖြစ်ခဲ့ပါတယ်။ “ R9” လို့ လူသိများတဲ့ ရော်နယ်ဒိုဟာ ပြိုင်ပွဲ တစ်လျှောက် ၈ ပွဲ ကစားပြီး ၈ ဂိုး သွင်းယူကာ ရွှေဖိနပ်ဆုကို ဆွတ်ခူးနိုင်ခဲ့ပါတယ်။ ဂျာမနီ အသင်းနဲ့ ကစားခဲ့တဲ့ ဗိုလ်လုပွဲမှာ ဘရာဇီးလ် အသင်း ၂-၀ နဲ့ အနိုင်ရရှိခဲ့တဲ့ သွင်းဂိုး ၂ ဂိုး စလုံးကို သူပဲ သွင်းယူခဲ့ပြီး အဲဒီပွဲရဲ့ အကောင်းဆုံး ကစားသမားဆု ကိုလည်း ရရှိခဲ့ပါတယ်။

တိုက်စစ်ပိုင်းမှာ ရီဗယ်လ်ဒို၊ ရော်နယ်ဒင်ဟို တို့နဲ့ အတူ ကြောက်မက်ဖွယ် ကောင်းတဲ့ ‘သုံးပွင့်ဆိုင် တိုက်စစ်တန်း’ ကို ဖွဲ့စည်းခဲ့တာကြောင့် ဘရာဇီးလ် အသင်းရဲ့ ချန်ပီယံဖြစ်ရေး ခရီးလမ်းဟာ ဘယ်တုန်းကမှ သံသယဖြစ်စရာ မလိုခဲ့ပါဘူး။ ရော်နယ်ဒိုရဲ့ ၂၀၀၂ ခုနှစ် စွမ်းဆောင်ရည်မှာ အံ့ဩစရာ အကောင်းဆုံး အချက် ကတော့ သူဟာ ကမ္ဘာ့ဖလား ပြိုင်ပွဲ မတိုင်ခင် ၂ နှစ် အလိုက ဒူးအရွတ်ပြတ် ဒဏ်ရာကြောင့် ကွင်းထဲကနေ ရေရှည် အနားယူခဲ့ရပြီး၊ ၂၀၀၂ ကမ္ဘာ့ဖလား အတွက် ဘရာဇီးလ် အသင်းရဲ့ တောင်အမေရိကဇုန် ခြေစစ်ပွဲစဉ် တစ်ပွဲမှ ပါဝင်ကစားခွင့် မရခဲ့ဘဲ အဓိက ပြိုင်ပွဲကြီးကျမှ ဝုန်းဒိုင်းကြဲ ခြေစွမ်းပြသွားနိုင်ခဲ့တာပဲ ဖြစ်ပါတယ်။

ရော်နယ်ဒိုဟာ ကမ္ဘာ့ဖလား ပြိုင်ပွဲတွေမှာ စုစုပေါင်း သွင်းဂိုး ၁၅ ဂိုး အထိ စံချိန်တင်နိုင်ခဲ့ပြီး ဒီစံချိန်ဟာ ၂၀၁၄ ခုနှစ်မှာ ဂျာမနီ တိုက်စစ်မှူး မီရိုဆလပ် ကလိုဆေးက ကျော်ဖြတ်မသွားခင် အထိ သမိုင်းတစ်လျှောက် အမြင့်ဆုံး ဖြစ်ခဲ့ပါတယ်။ တိုက်ဆိုင်စွာပဲ ကလိုဆေးက ရော်နယ်ဒိုရဲ့ စံချိန်ကို ကျော်ဖြတ်သွားတဲ့ ပွဲကတော့ ၂၀၁၄ ခုနှစ် ဘရာဇီးလ်မြေပေါ်မှာ ဘရာဇီးလ် အသင်းကို ဂျာမနီက ဂိုးပြတ် အရှက်ခွဲခဲ့တဲ့ ဆီမီးဖိုင်နယ် ပွဲစဉ် ဖြစ်ပြီး ရော်နယ်ဒိုတစ်ယောက် ပွဲကြည့်စင်ကနေ စိတ်မကောင်းစွာနဲ့ ထိုင်ကြည့်နေခဲ့ရပါတယ်။

   

●●●

နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS

အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်

ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်