နယ်သာလန် အသင်း အပေါ် အမြဲတမ်း မျှော်လင့်ချက် ကြီးမားလေ့ ရှိကြပေမဲ့ ဒီနွေရာသီမှာ သူတို့ရဲ့ ပထမဆုံး ကမ္ဘာ့ဖလား ချန်ပီယံဆုကို ဆွတ်ခူးနိုင်ဖို့ ကတော့ ဖြစ်နိုင်ခြေနည်းနေပုံ ရပါတယ်။
နယ်သာလန်ဟာ ကမ္ဘာ့ဖလား ပြိုင်ပွဲတွေမှာ ဗိုလ်လုပွဲ အထိ တက်လှမ်းနိုင်ခဲ့ပေမယ့် ဒုတိယနဲ့သာ ကျေနပ်ခဲ့ရပြီး ချန်ပီယံ တစ်ကြိမ်မှ မဖြစ်ခဲ့ဖူးပါဘူး။ ဒါပေမယ့် ဒီနွေရာသီ ပြိုင်ပွဲ ကတော့ လိမ္မော်ရောင်တွေ အတွက် သမိုင်းသစ်ရေးထိုးဖို့ အခွင့်အရေးကောင်း တစ်ခု ဖြစ်လာနိုင်ပါတယ်။
နယ်သာလန် အသင်းဟာ ဂျိုဟန် ခရိုက်ဖ်၊ မာကို ဗန်ဘက်စတင်နဲ့ ဒန်းနစ် ဘားကမ့်ပ် တို့လို နာမည်ကျော် ကြယ်ပွင့် ကစားသမားပေါင်း များစွာ ပေါ်ထွက်ခဲ့ဖူးပေမဲ့ နိုင်ငံတကာ ဘောလုံးလောကရဲ့ အကြီးကျယ်ဆုံး ဒီပြိုင်ပွဲမှာ ချန်ပီယံ မဖြစ်ဖူးသေးတာပါ။ အခု မြောက်အမေရိကမြေမှာ ယှဉ်ပြိုင်ရမယ့် နည်းပြ ရော်နယ် ကိုးမန်းရဲ့ လူစာရင်း မှာတော့ အရင်ကလို ထင်ရှားတဲ့ တိုက်စစ် အိုင်ကွန်တွေ မပါဝင်တော့ပါဘူး။ ဒါပေမယ့် အရည်အသွေးမြင့် ကစားသမားတွေနဲ့တော့ အခိုင်အမာ ဖွဲ့စည်းထားဆဲ ဖြစ်ပါတယ်။
အုပ်စု အဖွင့် ပွဲစဉ် အဖြစ် ဂျပန် အသင်းနဲ့ ရင်ဆိုင်ရမယ့်ပွဲမှာ နယ်သာလန် အသင်းသားတွေရဲ့ ပုခုံးထက်ကို ထုံးစံအတိုင်း ဖိအားတွေ သက်ရောက်နေမှာ ဖြစ်ပြီး၊ သူတို့ရဲ့ ချန်ပီယံ ဖြစ်နိုင်ခြေ အရည်အချင်း ကိုလည်း ပြိုင်ပွဲအစ ကတည်းက စမ်းသပ်ခံရမှာ ဖြစ်ပါတယ်။
ကမ္ဘာ့ဖလားဆီ ဖြတ်သန်းခဲ့ရတဲ့ လမ်းခရီး
• ခြေစစ်ပွဲ မှတ်တမ်း – ၆ ပွဲ နိုင်၊ ၀ ပွဲ ရှုံး၊ ၂ ပွဲ သရေ
• သွင်းဂိုး – ၂၇ ဂိုး၊ ပေးဂိုး – ၄ ဂိုး
• ဂိုးသွင်း အများဆုံး ကစားသမား – မမ်းဖစ် ဒီပိုင်း (၈ ဂိုး)
• ဂိုးဖန်တီးမှု အများဆုံး ကစားသမားများ – မမ်းဖစ် ဒီပိုင်း၊ ကိုဒီ ဂက်ခ်ပို (၄ ကြိမ်စီ)
၂၀၁၀ မှာ ဒုတိယ၊ ၂၀၁၄ ပြိုင်ပွဲမှာ တတိယ ရခဲ့ပြီး ၂၀၁၈ ရုရှား ကမ္ဘာ့ဖလား မှာတော့ ခြေစစ်ပွဲ မအောင်လို့ ပြိုင်ပွဲနဲ့ လွဲချော်ခဲ့ရတဲ့ နယ်သာလန် အသင်းဟာ အခု ခြေစစ်ပွဲမှာ ပိုလန် အသင်းရဲ့ ပြင်းပြင်းထန်ထန် ဖိအားပေးခြင်းကို ခံခဲ့ရပါတယ်။ ဒါပေမယ့် ၆ ပွဲ နိုင် ရလဒ် အပါအဝင် ရှုံးပွဲ မရှိ မှတ်တမ်းနဲ့ အတူ ကမ္ဘာ့ဖလား ကစားခွင့် လက်မှတ်ကို အရယူနိုင်ခဲ့တာ ဖြစ်ပါတယ်။
ဖင်လန်၊ လစ်သူယေးနီးယားနဲ့ မော်လ်တာ အသင်း တို့ကို ဂိုးမိုးရွာခဲ့တာက နယ်သာလန်ရဲ့ ဂိုးကွာခြားချက်ကို အသာစီးရစေခဲ့ပြီး၊ နောက်ဆုံး မှာတော့ ပလေးအော့ဖ်အဆင့် မှာတင် လှည့်ပြန်ခဲ့ရတဲ့ ပိုလန် အသင်းနဲ့ နှစ်ကျော့စလုံး သရေကျခဲ့တဲ့ ရလဒ် ကပဲ နယ်သာလန်ကို တိုက်ရိုက် ခြေစစ်ပွဲ အောင်မြင်ဖို့ သေချာစေခဲ့တာ ဖြစ်ပါတယ်။
နည်းပြ ရော်နယ် ကိုးမန်း
မကြာသေးမီနှစ်တွေ ရော်နယ် ကိုးမန်းရဲ့ ကစားသမားဘဝ ဖြတ်သန်းမှု သမိုင်းကြောင်းကြောင့် သူဟာ နယ်သာလန်ရဲ့ လေးစားရတဲ့ အိုင်ကွန် တစ်ဦး အဖြစ် ရပ်တည်နေနိုင်ပေမဲ့၊ လိမ္မော်ရောင် အသင်းကို ပထမဆုံးအကြိမ် ချန်ပီယံဆု ရအောင် စွမ်းဆောင်ပေးနိုင်မလား ဆိုတာ ကတော့ မေးခွန်းထုတ်စရာ ရှိနေပါတယ်။ ဘာစီလိုနာ နည်းပြဟောင်းဟာ နယ်သာလန် အသင်းကို နှစ်ကြိမ်ခွဲပြီး သက်တမ်း ၇ နှစ်နီးပါး ကိုင်တွယ်ခဲ့ဖူးပေမယ့် နည်းပြဘဝနဲ့ ကမ္ဘာ့ဖလား ပြိုင်ပွဲကို ပထမဆုံးအကြိမ် တာဝန်ယူရတာ ဖြစ်ပါတယ်။ ဒီပြိုင်ပွဲမှာသာ ရလဒ်ကောင်းအောင် မစွမ်းဆောင်နိုင်ဘူး ဆိုရင်တော့ သူ့အပေါ် ဝေဖန်မှုတွေ ပိုမိုပြင်းထန်လာမှာ ဖြစ်ပါတယ်။
နယ်သာလန် အသင်းရဲ့ ကစားကွက်နဲ့ စတိုင်
• အနှစ်သက်ဆုံး ကစားကွက် – ၄-၂-၃-၁
• ကစားဟန် – Hybrid (အခြေအနေအလိုက် ပြောင်းလဲကစားမှု)
• အားသာချက် – ဝါရင့် ကွင်းလယ် အစုအဖွဲ့နဲ့ တက်ကြွ ထက်မြက်တဲ့ ဗဟိုနောက်ခံလူတွေ ပိုင်ဆိုင်ထားခြင်း
• အားနည်းချက် – ဗဟိုတိုက်စစ်မှူး အင်အား မလုံလောက်ခြင်းနဲ့ ပုံစံမမှန်တဲ့ တောင်ပံကစားသမားတွေ ပိုင်ဆိုင်ထားခြင်း
Total Football (တစ်သင်းလုံး ဟန်ချက်ညီ တိုက်စစ်ဆင်မှု) က နယ်သာလန်ရဲ့ သွေးထဲသားထဲမှာ ရှိနေတာမို့ နည်းပြ ကိုးမန်း အနေနဲ့ သူ့အသင်းဆီ ကနေ မျက်စိပဒါသ ဖြစ်တဲ့ လှပတဲ့ တိုက်စစ်ဆင်မှုတွေကို မျှော်လင့်ထားမှာပါ။ အသင်းငယ်တွေနဲ့ ကစားတဲ့ အခါ ဘောလုံးပိုင်ဆိုင်မှု အသာစီးနဲ့ ဖိအားပေး ကစားမှာ ဖြစ်ပြီး အသင်းကြီးတွေနဲ့ ရင်ဆိုင်ရချိန် မှာတော့ တိုက်ရိုက်ပံ့ပိုးတဲ့ ကစားဟန်ကို ပြောင်းလဲ အသုံးပြုမှာ ဖြစ်ပါတယ်။
ခံစစ်ပိုင်းက တောင့်တင်းသလို ကွင်းလယ်မှာလည်း ရိုင်ယန် ဂရာဗန်ဘက်ချ်၊ ဖရန်ကီ ဒီယောင်နဲ့ တီဂျန်နီ ရိုင်းဒါးစ် တို့လို နည်းစနစ်ပိုင်း ကျွမ်းကျင်တဲ့ ကစားသမားတွေနဲ့ စုဖွဲ့ထားတာကြောင့် ဒီနေ့ခေတ် နယ်သာလန် အသင်းမှာ သဘောကျစရာတွေ အများကြီး ရှိနေပါတယ်။ ဒါပေမယ့် သူတို့ရဲ့ ရှေ့တန်း တိုက်စစ်ပိုင်းက အားရစရာ မရှိတာ ကိုတော့ ငြင်းလို့ မရပါဘူး။ အထူးသဖြင့် ဇာဗီ ဆီမွန်စ် တစ်ယောက် ACL ကြောင့် ပြိုင်ပွဲလွဲချော်ခဲ့ရတာက အသင်းရဲ့ အားနည်းချက်ကို ပိုမိုကြီးမားသွားစေပါတယ်။
စောင့်ကြည့်ရမယ့် ကစားသမားများ
အဓိက အဆုံးအဖြတ်ပေးနိုင်သူ – မမ်းဖစ် ဒီပိုင်း
ခြေစစ်ပွဲမှာ ၈ ဂိုး သွင်းယူပေးခဲ့တဲ့ ခေါင်းစည်းပတ်နဲ့ ဒီပိုင်းဟာ နယ်သာလန် အသင်းရဲ့ သမိုင်းတစ်လျှောက် ဂိုးအများဆုံး သွင်းသူ အဖြစ် ထိပ်ဆုံးမှာ ရပ်တည်နေပါတယ်။ အသက် ၃၂ နှစ် အရွယ် ရှိပြီ ဖြစ်တဲ့ ကိုရင်သီယန်စ် တိုက်စစ်မှူးဟာ မကြာသေးမီနှစ်တွေ အတွင်း ကလပ် အသင်း အဆင့်မှာ ဂိုးသွင်းခြေ ကျဆင်းနေခဲ့ပေမယ့် လိမ္မော်ရောင် လက်ရွေးစင် ဂျာစီကို ဝတ်ဆင်လိုက်ရင်တော့ ပြိုင်ဘက်တွေကို အမြဲတမ်း ခြိမ်းခြောက်နိုင်စွမ်း ရှိနေဆဲ ဖြစ်ပါတယ်။
စောင့်ကြည့်ရမယ့် လူငယ် ကြယ်ပွင့် – မစ်ကီ ဗန်ဒီဗန်
ယူရို ၂၀၂၄ မှာ လူစားဝင် ကစားသမား အဖြစ်သာ ပါဝင်ခဲ့ရတဲ့ ဗန်ဒီဗန် အတွက်တော့ ဒါဟာ နိုင်ငံတကာ ပြိုင်ပွဲကြီး တစ်ခုမှာ ပထမဆုံးအကြိမ် ပွဲထွက်ခွင့်ရမယ့် ပြိုင်ပွဲ ဖြစ်ပါတယ်။ ခံစစ်ကနေ တိုက်စစ်ဆင်ဖို့ ပြိုင်ဘက်တွေကို ကျော်ဖြတ်ပြီး လျှပ်စီးလို အရှိန်နဲ့ ဆွဲပြေးတတ်တဲ့ သူ့ရဲ့ ကစားဟန်ကို စောင့်ကြည့်ရမှာ ဖြစ်ပြီး၊ ဒီပြိုင်ပွဲရဲ့ အမြန်ဆုံး ကစားသမား အဖြစ် မှတ်တမ်းဝင်သွားရင်လည်း အံ့သြစရာ မရှိပါဘူး။
နယ်သာလန်ရဲ့ ခန့်မှန်းလူစာရင်း
နယ်သာလန် နည်းပြ ကိုးမန်းမှာ အထူးသဖြင့် ခံစစ်နဲ့ ကွင်းလယ်ပိုင်း အတွက် အရည်အသွေးမြင့် ကစားသမား အင်အား တောင့်တောင့်တင်းတင်း ရှိနေပါတယ်။ ဝါရင့် အသင်းခေါင်းဆောင် ဗာဂျယ် ဗန်ဒိုက်ခ်က ဗဟိုခံစစ် ကနေ ဦးဆောင်မှာ ဖြစ်ပြီး၊ သူ့ဘေးမှာ တွဲဖက်ဖို့ အတွက် နေရာစုံ ကစားနိုင်တဲ့ ဂျူရီယန် တင်ဘာ ရှိနေပါတယ်။ နေသန် အေခီ၊ ဂျန် ပေါလ် ဗန်ဟက်ကီနဲ့ ဗန်ဒီဗန်တို့ ကလည်း ခံစစ်အတွက် အားကိုးရမယ့်သူတွေ ဖြစ်ပါတယ်။ ဒန်ဇဲလ် ဒမ်းဖရီးစ် ညာတောင်ပံ ကနေ တိုက်စစ်လိုက်ပါချိန်မှာ ခံစစ်ကို ပိုမိုတောင့်တင်းစေဖို့ ဗန်ဒီဗန်ကို ဘယ်နောက်ခံလူ အဖြစ် သုံးလာနိုင်ခြေလည်း ရှိပါတယ်။
ကွင်းလယ် အထိုင် မှာတော့ ဂရာဗန်ဘက်ချ်နဲ့ ဖရန်ကီ ဒီယောင် တို့က အထူးကောင်းမွန်တဲ့ ကွင်းလယ် အတွဲအဖက် အဖြစ် ရှိနေမှာ ဖြစ်ပြီး၊ ရိုင်းဒါးစ် ကိုတော့ တိုက်စစ်ပိုင်းအထိ လွတ်လွတ်လပ်လပ် လိုက်ပါကစားခွင့် ပေးထားမှာ ဖြစ်ပါတယ်။ သို့ပေမယ့်လည်း ရှေ့တန်း မှာတော့ အရန် အင်အား အတွက် မေးခွန်းထုတ်စရာတွေ ရှိနေပါတယ်။ ဆီမွန်စ်က ဒဏ်ရာရနေသလို၊ ကိုဒီ ဂက်ခ်ပိုလည်း လူစာရင်းမှာ မပါတာကြောင့် အားကိုးရမယ့် အရန် အင်အား သိပ်မရှိပါဘူး။ ဗဟို တိုက်စစ်မှူးစစ်စစ် (နံပါတ် ၉ နေရာ) အတွက် ဆိုရင်တော့ ဒီပိုင်း တစ်ယောက်ပဲ ထင်ထင်ရှားရှား ရှိပါတော့တယ်။
ဂိုးသမား နေရာ မှာတော့ ဘရိုက်တန်နဲ့ အတူ ခြေစွမ်းပြနေတဲ့ ဘာတ် ဗာဘရက်ဂျန် ပွဲထွက်လာမှာ ဖြစ်ပေမယ့်၊ သူဟာ ပြိုင်ပွဲရဲ့ တခြား ချန်ပီယံ ရေပန်းစားတဲ့ အသင်းကြီးတွေက ဂိုးသမားတွေနဲ့ ယှဉ်ရင်တော့ အရည်အသွေးပိုင်း အနည်းငယ် လိုအပ်ချက် ရှိနေသေးတယ်လို့ ဆိုရမှာပါ။
လက်ရှိခြေစွမ်း
နယ်သာလန် အသင်းဟာ အခုနှစ်ရဲ့ နှစ်စပိုင်း ပွဲစဉ်တွေ အဖြစ် အာလင်း ဟာလန်းနဲ့ မာတင် အိုဒီဂတ်တို့ မပါဝင်နိုင်တဲ့ နော်ဝေ အသင်းကို ၂-၁ ရလဒ်နဲ့ ရုန်းကန်ပြီး အနိုင်ရခဲ့ပါတယ်။ အဲဒီနောက် မှာတော့ စမ်းသပ် လူစာရင်းနဲ့ ကစားခဲ့တဲ့ အီကွေဒေါနဲ့ ပွဲမှာ ၁၂ မိနစ် မှာတင် ဒမ်းဖရီးစ် အနီကတ်ပြခံခဲ့ရတာကြောင့် ၁-၁ ရလဒ်နဲ့ ရုန်းကန်ခဲ့ရပြန်ပါတယ်။
ဒီခြေစွမ်းတွေက ပရိသတ်တွေကို ယုံကြည်မှု တိုးမလာစေခဲ့တာမို့ နယ်သာလန် ပရိသတ်တွေ အနေနဲ့ ကမ္ဘာ့ဖလား ပြိုင်ပွဲ နီးကပ်လာတာနဲ့ အမျှ ကိုးမန်းရဲ့ အသင်းဆီကနေ ဒီထက်မက ပိုမိုကောင်းမွန်တဲ့ စွမ်းဆောင်ရည်တွေကို မျှော်လင့်နေကြမှာ ဖြစ်ပါတယ်။
အသင်း အပေါ် ခန့်မှန်းချက်များ
ယူရို ၂၀၂၄ မှာ ဆီမီးဖိုင်နယ် အထိ တက်လှမ်းနိုင်ခဲ့ပြီးနောက်မှာတော့ အခု မြောက်အမေရိကမြေ မှာလည်း ပြိုင်ပွဲရဲ့ နောက်ဆုံး အဆင့်တွေ အထိ တက်လှမ်းနိုင်မလား ဆိုတာ စိတ်ဝင်စားစရာပါ။ ဒါပေမယ့် ဒီတစ်ကြိမ် မှာတော့ ပြိုင်ဆိုင်မှုတွေက ပိုမိုပြင်းထန်လာမှာ ဖြစ်ပြီး၊ လက်ရှိ နယ်သာလန် အသင်းရဲ့ လူစာရင်းဟာ ပြင်သစ်၊ စပိန်နဲ့ အာဂျင်တီးနား တို့လို ကမ္ဘာ့အင်အားကြီး အသင်းတွေရဲ့ လူစာရင်းကို ယှဉ်ဖို့ လိုအပ်ချက်တွေ ရှိနေသေးတယ် ဆိုတာကို နယ်သာလန် နိုင်ငံသားတွေ ကိုယ်တိုင်လည်း လက်ခံထားကြပါတယ်။
ဒါပေမယ့် မျှော်လင့်ချက် ဖိအားနည်းနေခြင်းကပဲ မမျှော်လင့်ထားတဲ့ အောင်မြင်မှုတွေကို ယူဆောင်လာပေးနိုင်ပါတယ်။ ဝေဖန်မှုတွေ ရှိနေတဲ့ နည်းပြ ကိုးမန်း အနေနဲ့ ကွင်းဘေး ကနေ ဘယ်လိုပဲ ဦးဆောင်ပါစေ၊ လိမ္မော်ရောင်တို့ ဒီနွေရာသီမှာ အဆုံးထိ တက်လှမ်းပြီး ချန်ပီယံ ဖြစ်သွားဖို့ ဆိုတာ ဘယ်လိုမှ မဖြစ်နိုင်တဲ့ အရာတော့ မဟုတ်ပါဘူး။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
