ပြီးခဲ့တဲ့ ကမ္ဘာ့ဖလား ဗိုလ်လုပွဲ နှစ်ကြိမ်စလုံးကို တက်လှမ်းနိုင်ခဲ့တဲ့ ပြင်သစ်ဟာ အခု လာမယ့် ပြိုင်ပွဲ မှာလည်း နောက်ထပ် ထူးချွန် ပြောင်မြောက်တဲ့ သမိုင်းသစ် တစ်ခုကို ထပ်မံ ရေးထိုးနိုင်လိမ့်မယ်လို့ ခန့်မှန်းခံထားရပါတယ်။ ပြင်သစ်ဟာ ပြိုင်ပွဲကြီးတိုင်းမှာ ချန်ပီယံဆု အတွက် ရေပန်းအစားဆုံး အသင်း အဖြစ် အမြဲတမ်း ပါဝင်လေ့ရှိပြီး ဒီနွေရာသီ ကမ္ဘာ့ဖလား မှာလည်း တူတူပါပဲ။
နိုင်ငံတကာ ဘောလုံးလောကမှာ အတောင့်တင်းဆုံး အရန်အင်အား၊ ကွင်းလယ် ကွင်းပြင်နေရာစုံက ထိပ်သီး ကြယ်ပွင့်တွေနဲ့ ကမ္ဘာ့အဆင့် အမြင့်ဆုံး စင်မြင့်ထက်က အတွေ့အကြုံ ရင့်ကျက်မှုတွေကို ပိုင်ဆိုင်ထားတဲ့ အပြာရောင် တို့ဟာ အခုတစ်ကြိမ် မှာလည်း ပြိုင်ဘက်တိုင်း ရှိန်နေမယ့် အင်အားစု လူစာရင်းကို ပိုင်ဆိုင်ထားပါတယ်။ သူတို့ဟာ ၂၀၁၈ မှာ ဒုတိယအကြိမ် ကမ္ဘာ့ချန်ပီယံ ဖြစ်ခဲ့ပြီး လွန်ခဲ့တဲ့ ၄ နှစ် ကတော့ ပင်နယ်တီ အဆုံးအဖြတ်မှာ အသဲကွဲခဲ့ရကာ ကမ္ဘာ့ဖလား ဗိုလ်လုပွဲကို နှစ်ကြိမ် ဆက်တိုက် တက်လှမ်းထားနိုင်ခဲ့တာ ဖြစ်ပါတယ်။ ဒါကြောင့် နည်းပြ ဒီဒီယာ ဒက်စ်ရွှမ့်စ်ရဲ့ အသင်းသားတွေ အနေနဲ့ နောက်ထပ် ဗိုလ်လုပွဲ တစ်ကြိမ် တက်လှမ်းဦးမယ် ဆိုတာကို မဖြစ်နိုင်ဘူးလို့ လောင်းကြေးထပ်ရဲသူ ရှိမှာ မဟုတ်ပါဘူး။
ကီလီယန် အမ်ဘာပေးက ဆုဖလား ဆွတ်ခူးနိုင်ဖို့ အတွက် ကွင်းတွင်း ခေါင်းဆောင် အဖြစ် ကစားသမားကောင်းတွေရဲ့ ဝန်းရံမှုနဲ့ အတူ တိုက်စစ်ကို ဦးဆောင်သွားမှာပါ။ ပြင်သစ် အသင်း အတွက် စမ်းသပ်မှုတွေ ကတော့ ပြိုင်ပွဲ အစကတည်းက စတင်မှာ ဖြစ်ပြီး အုပ်စု အဆင့်မှာတင် ဆီနီဂေါ၊ နော်ဝေတို့နဲ့ ခက်ခက်ခဲခဲ ရင်ဆိုင် ကစားရဖို့ ရှိနေပါတယ်။
ကမ္ဘာ့ဖလားဆီ ဖြတ်သန်းခဲ့ရတဲ့ လမ်းခရီး
ခြေစစ်ပွဲ မှတ်တမ်း – ၅ ပွဲနိုင်၊ ၀ ပွဲရှုံး၊ ၁ ပွဲသရေ
သွင်းဂိုး – ၁၆ ဂိုး/ ပေးဂိုး – ၄ ဂိုး
ဂိုးသွင်း အများဆုံး ကစားသမား – ကီလီယန် အမ်ဘာပေး (၅ ဂိုး)
ဂိုးဖန်တီးမှု အများဆုံး ကစားသမား – ကီလီယန် အမ်ဘာပေး (၃ ကြိမ်)
မျှော်လင့်ထားတဲ့ အတိုင်းပဲ ပြင်သစ် အသင်းဟာ သူတို့ရဲ့ ခြေစစ်ပွဲ အုပ်စုမှာ ပထမနေရာကို အေးအေးလူလူ အရယူခဲ့ပါတယ်။ အဇာဘိုင်ဂျန်၊ ယူကရိန်း၊ အိုက်စလန်တို့ ပါဝင်တဲ့ အုပ်စုထဲမှာ အိုက်စလန် တစ်သင်းတည်းသာ ရေဂျာဗစ်မြို့မှာ ပြင်သစ်ကို ၂-၂ သရေကစားပြီး ၆ ပွဲ ဆက်တိုက်နိုင်မယ့် မှတ်တမ်းကို ဖျက်ဆီးနိုင်ခဲ့တာ ဖြစ်ကာ ဒါဟာ ပြင်သစ်ရဲ့ တစ်ခုတည်းသော အနာအဆာ ဖြစ်ခဲ့ပါတယ်။ ထုံးစံအတိုင်းပဲ အမ်ဘာပေးက ဂိုးသွင်းနဲ့ ဂိုးဖန်တီးမှု ဇယားတွေမှာ ထိပ်ဆုံးက ဦးဆောင်ပြီး အဓိက ဇာတ်လိုက် ဖြစ်ခဲ့ပါတယ်။
နည်းပြ ဒီဒီယာ ဒက်စ်ရွှမ့်စ်
လာမယ့် ကမ္ဘာ့ဖလားဟာ ဒက်စ်ရွှမ့်စ် အတွက်တော့ လမ်းဆုံး ဖြစ်လာပါလိမ့်မယ်။ ကစားသမားဘဝရော နည်းပြဘဝမှာပါ ကမ္ဘာ့ဖလားကို ဆွတ်ခူးဖူးတဲ့ ပြင်သစ် နည်းပြကြီးဟာ အခုပြိုင်ပွဲ အပြီးမှာ ရာထူး ကနေ နှုတ်ထွက်တော့မှာ ဖြစ်ပြီး၊ တန်ဖိုးကြီး ရွှေဖလားကြီးကို တတိယအကြိမ်မြောက် မြှောက်ကိုင်ပြီး သိက္ခာရှိရှိ နှုတ်ဆက်ထွက်ခွာနိုင်ဖို့ အပြင်းအထန် ဆန္ဒရှိနေမှာ ဖြစ်ပါတယ်။
ဒက်စ်ရွှမ့်စ်ဟာ ပြင်သစ် နည်းပြ ခုံတန်းမှာ ၁၄ နှစ်နီးပါး သက်တမ်း အတွင်း ဝေဖန်မှုနဲ့ ထောက်ခံမှု ဒွန်တွဲနေတဲ့ ပုဂ္ဂိုလ် တစ်ဦး ဖြစ်ခဲ့ပေမယ့် သူထွက်ခွာသွားချိန် မှာတော့ အသက် ၅၇ နှစ် အရွယ် နည်းပြကြီး အပေါ် အားလုံးက အလေးအနက် တန်ဖိုးထားကြမှာပါ။ ရလဒ်ထွက်ရေး လက်တွေ့ဆန်လွန်းတဲ့ ကစားကွက်နဲ့ စနစ်တကျ ဖွဲ့စည်းမှုတွေကြောင့် တစ်ခါတရံမှာ ပြင်သစ် အသင်းရဲ့ အံ့အားသင့်စရာ တိုက်စစ်အလှအပတွေနဲ့ စိတ်ကူးစိတ်သန်းတွေကို ပျောက်ဆုံးစေခဲ့တယ်လို့ ဆိုကြပေမယ့်၊ ဗိုလ်လုပွဲတွေကို ဆက်တိုက် တက်လှမ်းနိုင်ခဲ့တာနဲ့ ၂၀၁၈ ကမ္ဘာ့ဖလားကို သိမ်းပိုက်ပေးနိုင်ခဲ့တာတွေ ကပဲ သူ့ရဲ့ အောင်မြင်မှုတွေကို ကြီးကျယ် ခမ်းနားစေခဲ့တာ အမှန်ပဲ ဖြစ်ပါတယ်။ ဒါကြောင့် သူ့ အနေနဲ့ ဒီနွေရာသီမှာ နောက်ထပ် သမိုင်းသစ် ရေးထိုးနိုင်ဦးမလားဆိုတာ စောင့်ကြည့်ရမှာပါ။
ပြင်သစ် အသင်းရဲ့ ကစားကွက်နဲ့ စတိုင်
အနှစ်သက်ဆုံး ကစားကွက် – ၄-၂-၃-၁
ကစားဟန် -အခြေအနေ အလိုက် ပြောင်းလဲကစားမှု
အားသာချက် – ကြောက်စရာ ကောင်းတဲ့ ရှေ့တန်း တိုက်စစ်နဲ့ ပြိုင်ပွဲကြီး အတွေ့အကြုံ ကျွမ်းကျင်မှု
အားနည်းချက် – နောက်ခံ အစွန်လူ နေရာနဲ့ ဂိုးသမား နေရာမှာ အရန်အင်အား အားနည်းမှု
ဒက်စ်ရွှမ့်စ်ဟာ မယုံနိုင်စရာကောင်းတဲ့ တိုက်စစ်အစုအဖွဲ့ကို ပိုင်ဆိုင်ထားခွင့်ရလို့ ကံကောင်းသူ ဖြစ်ပါတယ်။ အမ်ဘာပေးနဲ့ အတူ ကမ္ဘာ့အဆင့် ထိပ်သီးကစားသမားတွေ ရှေ့တန်းမှာ စုပြုံနေတာကြောင့် ပြင်သစ် အသင်းဟာ တစ်ခါတရံ အသင်းလိုက်ကစားဟန် ပုံစံမကောင်းရင်တောင် ကစားသမား တစ်ဦးချင်းစီရဲ့ တစ်ကိုယ်တော် ပါရမီနဲ့တင် ပွဲတွေကို အနိုင်ယူသွားနိုင်စွမ်း ရှိပါတယ်။
ဒါပေမယ့် တိုက်စစ်က ဘယ်လောက်ပဲ ထက်မြတ်နေပါစေ ဒက်စ်ရွှမ့်စ်ရဲ့ ပြင်သစ်ဟာ တစ်ကိုယ်တော် ထင်ပေါ်မှုထက် အသင်းရဲ့ စနစ်တကျ ဖွဲ့စည်းမှု၊ တည်ဆောက်ပုံနဲ့ ဟန်ချက်ညီမှုကို ပိုမိုဦးစားပေးလေ့ ရှိပါတယ်။ ဒက်စ်ရွှမ့်စ်ဟာ သူ့ရဲ့ ကြယ်ပွင့် ကစားသမားတွေဆီ ကနေ အသင်း အတွက် ပေးဆပ် ကစားလိုစိတ်နဲ့ ကြိုးစား အားထုတ်မှုကို အပြည့်အဝ တောင်းဆိုလေ့ ရှိပါတယ်။
စောင့်ကြည့်ရမယ့် ကစားသမားများ
အဓိက အဆုံးအဖြတ်ပေးနိုင်သူ – ကီလီယန် အမ်ဘာပေး
၂၀၁၈ ကမ္ဘာ့ဖလား ဗိုလ်လုပွဲမှာ ဂိုးသွင်းယူပြီးကတည်းက အမ်ဘာပေးဟာ ပြင်သစ် အသင်းရဲ့ အဓိက သင်္ကေတ ဖြစ်လာခဲ့ပါတယ်။ လက်ရှိ ရီးရဲလ်မက်ဒရစ် မှာလည်း မယုံနိုင်စရာ ခြေစွမ်းပြနေတဲ့ ဒီမြန်နှုန်းမြင့် တိုက်စစ်မှူးဟာ ပျော့ပျောင်းညင်သာတဲ့ လှုပ်ရှားမှုတွေနဲ့ အတူ ထိန်းမနိုင်သိမ်းမရ အင်အား၊ ရက်စက်တဲ့ ဂိုးသွင်းဗီဇတွေကို ပေါင်းစပ်ပြီး ခြေစွမ်းပြနေဆဲ ဖြစ်ပါတယ်။
စောင့်ကြည့်ရမယ့် လူငယ် ကြယ်ပွင့် – မာနူ ကိုနေး
ကွင်းလယ် နေရာစုံမှာ ကစားနိုင်တဲ့ ကိုနေးဟာ ကြယ်ပွင့် တစ်ပွင့် ဖြစ်လာမယ်လို့ ကာလရှည် မျှော်လင့်ခံထားရသူ ဖြစ်ပြီး ရိုးမားနဲ့ အတူ အထင်ကြီးစရာ ဖြတ်သန်းမှု အပြီးမှာ သူ့ရဲ့ ဂုဏ်သတင်းက ပိုမိုကြီးထွားလာခဲ့ပါတယ်။ အသက် ၂၅ နှစ် အရွယ် ကွင်းလယ်လူဟာ ပြင်သစ်ရဲ့ ကွင်းလယ် အင်ဂျင်ခန်းထဲက နာမည်ကျော် ကစားသမားတွေကြားထဲမှာ ပြင်းထန်တဲ့ ပြိုင်ဆိုင်မှုကို ရင်ဆိုင်ရမှာ ဖြစ်ပေမယ့် ကမ္ဘာ့စင်မြင့်ထက်မှာ သူ့ကိုယ်သူ သက်သေပြဖို့ အသင့်ဖြစ်နေပါပြီ။
ပြင်သစ်ရဲ့ ခန့်မှန်းလူစာရင်း
ဒက်စ်ရွှမ့်စ်ရဲ့ လက်ထဲမှာ ရွေးချယ်စရာတွေ များပြားလွန်းတာကြောင့် ပြင်သစ် အသင်းဟာ ချန်ပီယံဆုကို စိန်ခေါ်နိုင်တဲ့ လူစာရင်း နှစ်သင်းစာလောက် အထိ တည်ဆောက်နိုင်စွမ်း ရှိပါတယ်။ အားလုံးရဲ့ အကြည့်တွေ ကတော့ တားဆီးရ ခက်ခဲမယ့် ရှေ့တန်း တိုက်စစ်ဆီကို ချက်ချင်း ရောက်ရှိသွားမှာ ဖြစ်ပြီး အမ်ဘာပေးက တိုက်စစ်ကို ဦးဆောင်ကာ မိုက်ကယ် အိုလစ်ဆီ၊ ဒီဆီရီ ဒူယေးနဲ့ ဘယ်လွန်ဒေါဆုရှင် အူစမန်နီ ဒမ်ဘီလီ တို့လို ကစားသမားတွေက ပွဲထွက်လာဖို့ ရှိနေပါတယ်။
ကွင်းလယ်ပိုင်း ကတော့ ရှေ့တန်းလောက် နာမည် မကြီးပေမဲ့ ရီးရဲလ်မက်ဒရစ်ရဲ့ ကြယ်ပွင့် ဖြစ်တဲ့ အော်ရီလီယန် ချူအာမန်နီ၊ ပီအက်စ်ဂျီရဲ့ လူငယ်လေး ဝါရင် ဇိုင်း-အမ်မရီတို့ အပြင် အတွေ့အကြုံရင့် ဝါရင့်ကစားသမားတွေ ဖြစ်တဲ့ အန်ဂိုလို ကွန်တေနဲ့ အက်ဒရီယန် ရာဘီယော့တ်တို့ ရှိနေပါတယ်။ ဒါပေမယ့် ဒက်စ်ရွှမ့်စ်ရဲ့ ကွင်းလယ် အထိုင်မှာတော့ သူတို့ထဲက နှစ်ဦးပဲ ပွဲထွက်ခွင့်ရမှာပါ။
ဗဟို ခံစစ် အတွဲအဖက် မှာတော့ ဝီလီယမ် ဆလီဘာနဲ့ ဒါယော့တ် အူပါမီကာနိုတို့ထက် ပိုပြီး ပြည့်စုံတဲ့ အတွဲအဖက် ရှိလာဖို့ မလွယ်သလို၊ သူတို့ နောက်ကွယ်မှာလည်း မိုက် မိုက်ဂ်နွန်က စိတ်ချရတဲ့ လက်အစုံနဲ့ စောင့်ကြပ်နေမှာ ဖြစ်ပါတယ်။ ဂျူးလ်စ် ကွန်ဒေးနဲ့ သီယို ဟာနန်ဒက်စ် တို့က ခံစစ် အစွန်နေရာတွေ အတွက် တောင့်တင်းတဲ့ ရွေးချယ်မှုတွေ ဖြစ်ပေမယ့် သူတို့ နောက်မှာတော့ အရန်အင်အား သိပ်မရှိပါဘူး။
လက်ရှိခြေစွမ်း
ပြင်သစ် အသင်းဟာ အခုနှစ် မတ်လ အတွင်း ကစားခဲ့တဲ့ ခြေစမ်းပွဲတွေမှာ ပြိုင်ဘက် တောင်အမေရိက ထိပ်သီး နှစ်သင်းကို အနိုင်ယူပြီး ယုံကြည်မှု မြှင့်တင်ထားပါတယ်။ ဘရာဇီးလ်ကို ၂-၁ နဲ့ အနိုင်ရရှိခဲ့ပြီးနောက် ဒက်စ်ရွှမ့်စ်ရဲ့ ဒုတိယ အသင်းက ကိုလံဘီယာကို ၃-၁ ရလဒ်နဲ့ အထင်ကြီးစရာ တိုက်စစ်ဆင်မှုတွေ ပြုလုပ်ပြီး အနိုင်ရရှိခဲ့ပါတယ်။
အသင်း အပေါ် ခန့်မှန်းချက်များ
ယူရို ၂၀၂၄ သဘာဝကျကျပဲ ပြင်သစ် ပရိသတ်တွေရဲ့ မျှော်လင့်ချက်က ကောင်းကင်ယံ အထိ မြင့်မားနေပြီး သူတို့ရဲ့ ယုံကြည်မှု ကိုလည်း ဘယ်သူမှ အပြစ်ပြောလို့မရပါဘူး။ အသင်းတွင်း မမျှော်လင့်ဘဲ ပြိုလဲသွားတာမျိုး မရှိရင်တော့ ကမ္ဘာ့ဖလားရဲ့ နောက်ဆုံး အဆင့်တွေအထိ တက်လှမ်းနိုင်ဖို့က သေချာသလောက် ရှိနေပါတယ်။ ပြီးခဲ့တဲ့ ဆယ်စုနှစ် အတွင်း ပြင်သစ် အသင်းရဲ့ စွမ်းဆောင်ရည်က ဘယ်လောက်တောင် ကောင်းမွန်ခဲ့သလဲ ဆိုရင် ပရိသတ်တွေ အနေနဲ့ ချန်ပီယံဆုက လွဲလို့ ကျန်တဲ့ ရလဒ်မှန်သမျှကို စိတ်ပျက်မိကြမှာ ဖြစ်ပါတယ်။
ဒါပေမဲ့ ပြိုင်ပွဲကြီးတွေရဲ့ သဘာဝက တစ်ခါတရံ ရက်စက်တတ်ပြီး ပွဲတစ်ပွဲအတွင်း ပုံစံမကောင်းရုံနဲ့တင် အကုန်ပျက်စီးသွားနိုင်ပါတယ်။ ဒါပေမယ့်လည်း ပြင်သစ် အသင်း မှာက ပြိုင်ပွဲ အစောပိုင်း တစ်လျှောက်လုံးကို အေးအေးဆေးဆေး ကစားသွားနိုင်ပြီး၊ အဆုံးအဖြတ် အတွက် အရေးကြီးတဲ့ အချိန်ကျမှသာ ထပေါက်ကွဲနိုင်တဲ့ လက်နက်ကောင်းတွေကို အခိုင်အမာ ပိုင်ဆိုင်ထားတာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
