ချဲလ်ဆီးဟာ စိတ်ပျက်စရာကောင်းတဲ့ ရာသီတစ်ခုရဲ့ နောက်ဆုံး အိမ်ကွင်း ပွဲစဉ်မှာ တော့တင်ဟမ်ဟော့စပါးကို အနိုင်ယူပြီး ပရီးမီးယားလိဂ်ရဲ့ ကာလရှည်ကြာ နိုင်ပွဲ ပျောက်ဆုံးနေမှုကို အဆုံးသတ်နိုင်ခဲ့ပါတယ်။ ဂိုးသမား ရောဘတ် ဆန်းချက်ဇ် ကတော့ ဒီရာသီမှာ အကြောင်းရင်းများစွာကြောင့် သူတို့ အသင်း နောက်ကျ ကျန်ခဲ့ရပေမယ့် ချဲလ်ဆီး အသင်းသားတိုင်းဟာ လာမယ့် ရာသီမှာ ဇာဘီ အလွန်ဆိုရဲ့ လက်အောက်မှာ ဖြတ်သန်းရမယ့် အချိန်တွေကို မျှော်လင့်စောင့်စားနေကြတယ်လို့ ပြောကြားခဲ့ပါတယ်။
ချဲလ်ဆီးဟာ မနေ့က စတမ်းဖို့ဒ်ဘရစ်ချ်မှာ မြို့ခံပြိုင်ဘက် တော့တင်ဟမ်ဟော့စပါးကို ၂-၁ နဲ့ အနိုင်ရရှိခဲ့တာကြောင့် ရော်ဘတ်တို ဒီဇာဘီရဲ့ တော့တင်ဟမ်ဟော့စပါးဟာ ရာသီပိတ် နောက်ဆုံး ပွဲစဉ်ကျမှ တန်းဆင်းရမယ့် အခြေအနေနဲ့ ရင်ဆိုင်နေရဆဲ ဖြစ်ပါတယ်။ ခြင်္သေ့ပြာတို့ အတွက်တော့ ချန်ပီယံလိဂ် ဝင်ခွင့် ရရှိဖို့ မဖြစ်နိုင်တော့ပေမယ့်လည်း၊ အဆင့် ၇ နေရာက ဘရိုက်တန်ကို ကျော်တက်ဖို့ ရည်မှန်းချက်နဲ့အတူ ဥရောပ ပြိုင်ပွဲ ဝင်ခွင့် ရရှိဖို့ ကတော့ အခွင့်အရေး ရှိနေဆဲ ဖြစ်ပါတယ်။
ချဲလ်ဆီးဟာ ၂၀၂၅ ခုနှစ်မှာ ယူရိုပါကွန့်ဖရင့်လိဂ်နဲ့ ကလပ် ကမ္ဘာ့ဖလား ဆုဖလားတွေကို ဆွတ်ခူးနိုင်ခဲ့ပြီးနောက် ဒီရာသီ မှာတော့ နည်းပြတွေ ဖြစ်တဲ့ အန်ဇို မာရက်စကာနဲ့ လီယမ် ရိုစီနီယာ တို့ကို ရာထူးကနေ ထုတ်ပယ်ခဲ့ပြီး ကြားဖြတ် နည်းပြ ကော်လမ် မက်ဖာလိန်းရဲ့ လက်အောက်မှာ ရာသီကို အဆုံးသတ်ရတဲ့ အထိ အဖုအထစ်တွေ များပြားခဲ့တာပါ။ ဒါပေမယ့် ပြီးခဲ့တဲ့ နှစ်ရာသီလောက်ကမှ လေဗာကူဆင်နဲ့ အတူ ပြည်တွင်းဖလား နှစ်လုံးကို ရှုံးပွဲမရှိ စံချိန်နဲ့ ဆွတ်ခူးပေးခဲ့တဲ့ အလွန်ဆိုဟာ ၂၀၂၇ ရာသီမှာ ချဲလ်ဆီးကို လာရောက် ကိုင်တွယ်တော့မယ် ဆိုတဲ့ သတင်းထုတ်ပြန်ချက် အပြီး မှာတော့ ဆန်းချက်ဇ် တစ်ယောက် စိတ်လှုပ်ရှားလို့နေပါတယ်။
“ကျွန်တော်တို့ တကယ်ကို ဝမ်းသာပါတယ်။ ကိုယ့်အိမ်ကွင်းမှာ ပရိသတ်တွေရှေ့ အခုလို ရလဒ်မျိုး ရခဲ့တာ ကောင်းပါတယ်။ ဒီနိုင်ပွဲကို မျှော်လင့်နေခဲ့ရတာ တော်တော်လေး ကြာပါပြီ” လို့ ၎င်းက Sky Sports ကို ပြောကြားခဲ့ပါတယ်။ ရာသီကို အခုလိုမျိုး အဆုံးသတ်နိုင်တာ ကောင်းပါတယ်။ လာမယ့် နောက်ဆုံး နှစ်ပွဲ ကနေ ၆ မှတ် ရအောင် ယူနိုင်ရင် ဥရောပ ဝင်ခွင့် ရဖို့ မျှော်လင့်ချက် ရှိနေသေးတယ် ဆိုတာ ကျွန်တော်တို့ သိပါတယ်။ ကျွန်တော် တော်တော်လေး ဝမ်းသာပါတယ်။”
“သူတို့ (တော့တင်ဟမ်) သွင်းသွားတဲ့ ဂိုးကတော့ ကံနည်းနည်းပါသွားတယ်လို့ ထင်ပါတယ်။ ကျွန်တော်တို့ အနေနဲ့ ကျန်တဲ့ မိနစ် ၆၀ ဒါမှမဟုတ် ၇၀ လောက်မှာ ကစားခဲ့တဲ့ ပုံစံအတိုင်းပဲ ဆက်ထိန်းထားဖို့ လိုအပ်ခဲ့တာပါ။ ကျွန်တော်တို့ အဲဒီလို လုပ်နိုင်ခဲ့လို့ သူတို့ တခြားအခွင့်အရေးတွေ ထပ်မရခဲ့တာ ဖြစ်ပါတယ်။” လို့ ဆန်းချက်ဇ်က ပြောပါတယ်။
သူတို့ရဲ့ နောက်ဆုံး အိမ်ကွင်း ပွဲစဉ်မှာ အနိုင်ရရှိခဲ့မှုရဲ့ အရေးကြီးပုံကို မေးမြန်းရာ မှာတော့ ဆန်းချက်ဇ်က အခုလိုပဲ ထပ်လောင်း ပြောကြားခဲ့ပါတယ်။ “အသင်းမှာ အပြောင်းအလဲတွေ အများကြီး၊ အတက်အကျတွေ အများကြီး ရှိခဲ့ပါတယ်။ အကြောင်းရင်းများစွာကြောင့် ခြေစွမ်းကို တည်ငြိမ်အောင် ထိန်းထားဖို့ ကျွန်တော်တို့အတွက် ခက်ခဲခဲ့ပါတယ်။ ဒါပေမယ့် အသင်းက ကစားသမားတွေ ကတော့ သူတို့ လုပ်နိုင်သမျှ အကောင်းဆုံး ကြိုးစားခဲ့ကြတာပါ။ ကျွန်တော်တို့ ပျော်ရွှင်ရသလို လာမယ့် ရာသီ ကိုလည်း မျှော်လင့် စောင့်စားနေပါတယ်။” လို့ ဆိုပါတယ်။
ချဲလ်ဆီး အသင်း အတွက် ကွင်းလယ်လူတွေ ဖြစ်ကြတဲ့ အန်ဇို ဖာနန်ဒက်ဇ်နဲ့ အန်ဒရီ ဆန်းတို့စ် တို့က ဂိုးတွေ သွင်းယူပေးခဲ့ကြတာ ဖြစ်ပြီး၊ ပွဲချိန်နှောင်းပိုင်းမှာ တော့တင်ဟမ်ဟော့စပါး အတွက် ရစ်ချာလီဆင် သွင်းယူခဲ့တဲ့ ချေပဂိုး ကတော့ စပါးတို့ ပွဲကို ပြန်လာနိုင်ဖို့ အတွက် မလုံလောက်ခဲ့ပါဘူး။ ဆန်းချက်ဇ်ဟာ ပွဲရလဒ် ၀-၀ ဖြစ်နေချိန် မှာလည်း ပြင်သစ် ကစားသမားလေး မက်သီ တဲလ်ရဲ့ ဂိုးဖြစ်လုနီးပါး ခေါင်းတိုက်ချက်ကို ဂိုးတိုင်ပေါ် ကနေ ကျော်အောင် လက်ဖျားနဲ့ ပုတ်ထုတ်ပြီး အသင်း အတွက် အရေးပါတဲ့ ကာကွယ်မှု တစ်ခု ပြုလုပ်ခဲ့ပါသေးတယ်။
ဒါပေမယ့် အဲဒီလို လက်စွမ်းပြ ကာကွယ်နိုင်ခဲ့မှုအပေါ် မေးမြန်းတဲ့အခါ မှာတော့ စပိန် ဂိုးသမားက “အဲဒါက ဆိုးရွားတဲ့ ကာကွယ်မှု တစ်ခုပါ။ ကျွန်တော် အဲဒီလို အနေအထားမျိုးကို မုန်းပါတယ်။ ဘောလုံးက တိုင်လည်း ထိသွားတယ်၊ ကျွန်တော့် လက်လည်း လာထိသွားတာပါ။ ဒါပေမယ့် အသင်းဖော်တွေ ကတော့ ကောင်းကောင်း ကစားနိုင်ခဲ့ကြပါတယ်။ လေ့ကျင့်ရေးဆင်းတဲ့ ပုံစံကနေ အပြောင်းအလဲ အနည်းငယ် ရှိခဲ့သလို ဒဏ်ရာရတဲ့ ပြဿနာအချို့လည်း ရှိခဲ့ပါတယ်။ ဒါပေမယ့် အသင်းက ကစားသမားတွေ ကတော့ တကယ့်ကို ထူးထူးခြားခြား ကောင်းမွန်ခဲ့ကြပါတယ်။ ကျွန်တော်တို့ တော်တော်လေး ဝမ်းသာပါတယ်။” လို့ ဆိုပါတယ်။
ချဲလ်ဆီးဟာ အခုဆိုရင် အိမ်ကွင်း လန်ဒန် ဒါဘီပွဲစဉ် ၈ ပွဲ ဆက်တိုက် ရှုံးပွဲ မရှိစံချိန် (၆ ပွဲနိုင်၊ ၂ ပွဲသရေ) ကို ရရှိထားတာ ဖြစ်ပါတယ်။ ဒါဟာ ၂၀၁၃ ကနေ ၂၀၁၅ ခုနှစ်အတွင်း ၁၃ ပွဲဆက် ရှုံးပွဲ မရှိခဲ့တဲ့ စံချိန်နောက်ပိုင်း ပရီးမီးယားလိဂ် အိမ်ကွင်း လန်ဒန်ဒါဘီတွေမှာ သူတို့ရဲ့ အရှည်ကြာဆုံး ရှုံးပွဲမရှိ မှတ်တမ်းလည်း ဖြစ်လာခဲ့ပါတယ်။
သူတို့ရဲ့ အခုနိုင်ပွဲဟာ ပြီးခဲ့တဲ့ မတ်လတုန်းက အက်စတွန်ဗီလာကို ၄-၁ ဂိုးနဲ့ နိုင်ခဲ့တဲ့ပွဲပြီးရင် ပရီးမီးယားလိဂ်မှာ ပထမဆုံးအကြိမ် ပြန်လည်ရရှိခဲ့တဲ့ နိုင်ပွဲလည်း ဖြစ်ပါတယ်။ ချဲလ်ဆီးဟာ ပြီးခဲ့တဲ့ လိဂ်ပွဲစဉ် ၇ ပွဲစလုံးမှာ နိုင်ပွဲ လုံးဝ မရခဲ့ဘဲ (၁ ပွဲသရေ၊ ၆ ပွဲရှုံး) ရလဒ် ထွက်ပေါ်ခဲ့တာ ဖြစ်ပါတယ်။ သူတို့ဟာ ရာသီပိတ် နောက်ဆုံး ပွဲစဉ် အဖြစ် ဆန်းဒါးလန်းရဲ့ အိမ်ကွင်းကို သွားရောက် ရင်ဆိုင်ရမှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
