လာမယ့် ရာသီမှာ ဂီတာဖေး အသင်း ကတော့ ဥရောပပြိုင်ပွဲ ယှဉ်ပြိုင်ခွင့် ရရှိသွားခဲ့ပြီး၊ ဂီရိုနာနဲ့ မာယော့ကာတို့ ကတော့ ရီးရဲလ်အိုဗီယေဒိုနဲ့ အတူ လာလီဂါ ကနေ တန်းဆင်းသွားခဲ့ကြရပြီ ဖြစ်ပါတယ်။
ဂီရိုနာဟာ အဲလ်ချီနဲ့ ၁-၁ သရေကျခဲ့ပြီးနောက် လာလီဂါ ကနေ တန်းဆင်းခဲ့ရတာ ဖြစ်ပါတယ်။ တဖက်မှာ အိုဆာဆူနာနဲ့ လီဗန်တေး နှစ်သင်းစလုံး ရှုံးနိမ့်ခဲ့ကြတာကြောင့် ဂီရိုနာ အနေနဲ့ နောက်ဆုံး ပွဲစဉ်မှာ အနိုင်ရခဲ့ရင် စပိန် ထိပ်သီးလိဂ်မှာ ဆက်ရှိနေဖို့ လုံလောက်ခဲ့ပေမယ့် အိမ်ကွင်းမှာ ရမှတ် ၃ မှတ်လုံး ရအောင် မစွမ်းဆောင်နိုင်ခဲ့ပါဘူး။
အဲလ်ချီ အတွက် အယ်လ်ဗာရို ရိုဒရီဂွက်ဇ်ရဲ့ သွင်းဂိုးကို ဂီရိုနာ အသင်းခေါင်းဆောင် အာနော မာတီးနက်ဇ်က ပြန်လည် ချေပခဲ့တာ ဖြစ်ပြီး၊ အဲလ်ချီ ကတော့ ဒီအရေးကြီးတဲ့ သရေရလဒ်ကြောင့် တန်းဆင်းဇုန် ကနေ လွတ်မြောက်သွားခဲ့ပါတယ်။
ဂီတာဖေးကို ၁-၀ နဲ့ ရှုံးခဲ့တဲ့ အိုဆာဆူနာနဲ့၊ ရီးရဲလ်ဘက်တစ်ကို ၂-၁ နဲ့ ရှုံးခဲ့တဲ့ လီဗန်တေး တို့ဟာ တန်းဆင်းသွားခဲ့ပြီး ဖြစ်တဲ့ ရီးရဲလ်အိုဗီယေဒိုကို ၃-၀ နဲ့ အနိုင်ခဲ့တဲ့ မာယော့ကာနဲ့ ရမှတ်တူ (၄၂ မှတ်စီ) နဲ့ ရင်တထိတ်ထိတ်နဲ့ တန်းဆင်းဇုန် ကနေ သီသီလေး လွတ်မြောက်သွားခဲ့ပါတယ်။
အိုဆာဆူနာဟာ ဒီရာသီ မာယော့ကာနဲ့ ထိပ်တိုက်တွေ့ဆုံမှု နှစ်ကြိမ်စလုံးမှာ ၂-၂ ရလဒ်နဲ့ သရေကျခဲ့တာကြောင့် ဂိုးကွာခြားချက် အသာနဲ့ တန်းဆင်းဇုန် အပေါ်မှာ ရပ်တည်နိုင်ခဲ့တာ ဖြစ်ပြီး၊ လီဗန်တေး ကတော့ ထိပ်တိုက်တွေ့ဆုံမှု မှတ်တမ်းမှာ အသာစီးရခဲ့တာကြောင့် လာလီဂါ မှာ ဆက်ရှိနိုင်ခဲ့တာ ဖြစ်ပါတယ်။ အဆင့် ၁၉ နေရာက ဂီရိုနာနဲ့ အဆင့် ၁၃ နေရာက ဆီဗီလာတို့ အကြားမှာ ရမှတ် ၂ မှတ်သာ ကွာခြားခဲ့ပြီး၊ ဆီဗီလာ ကတော့ နောက်ဆုံး ပွဲစဉ်မှာ ဆဲလ်တာဗီဂိုကို ၁-၀ နဲ့ ရှုံးနိမ့်ခဲ့ပါတယ်။
အဲဒီရလဒ်ကြောင့် ဆဲလ်တာဗီဂို အသင်းက ယူရိုပါလိဂ် ဝင်ခွင့် သေချာသွားခဲ့ပြီး၊ ဂီတာဖေး ကတော့ အိုဆာဆူနာကို နိုင်ခဲ့တဲ့ ပွဲကြောင့် ယူရိုပါကွန့်ဖရင့်လိဂ် ပလေးအော့ဖ် ဝင်ခွင့်ကို အရယူနိုင်ခဲ့ပါတယ်။ ထူးခြားချက် အနေနဲ့ ဂီတာဖေး အသင်းဟာ အဆင့် ၇ နေရာနဲ့ ရာသီပိတ်နိုင်ခဲ့ပေမယ့် ၃၈ ပွဲမှာ ၃၂ ဂိုးသာ သွင်းယူနိုင်ခဲ့တာကြောင့် သူတို့ရဲ့ လိဂ်ရာသီ ခရီးစဉ်ကို အနုတ် ဂိုးကွာခြားချက် (-၆) နဲ့ အဆုံးသတ်ခဲ့ရတာ ဖြစ်ပါတယ်။
ဂီရိုနာ အသင်း အနေနဲ့ တန်းဆင်းရတာကို မိမိကိုယ်ကိုယ်သာ အပြစ်တင်ရမှာ ဖြစ်ပါတယ်။ ဂီရိုနာက တန်းတင် ကျန်ရစ်ဖို့ ရုန်းကန်ရတဲ့ နောက်ဆုံး လာလီဂါ ၇ ပွဲစလုံးမှာ နိုင်ပွဲ ၁ ပွဲမှ မရခဲ့ဘဲ (၃ ပွဲ သရေ၊ ၄ ပွဲ ရှုံး) ရလဒ် ထွက်ပေါ်ခဲ့လို့ ဖြစ်ပါတယ်။
မာယော့ကာရဲ့ နောက်ဆုံး ပွဲစဉ်က အနိုင်ရလဒ်ဟာ လာလီဂါ နောက်ဆုံး ၄ ပွဲအတွင်း ပထမဆုံးအကြိမ် ပြန်လည် အနိုင်ရခဲ့တာလည်း ဖြစ်ပါတယ် (၁ ပွဲသရေ၊ ၂ ပွဲရှုံး)။ သူတို့ ရရှိခဲ့တဲ့ စုစုပေါင်း ၄၂ မှတ် ဆိုတာ ကတော့ ၂၀၁၀-၁၁ ရာသီက ဒီပို့တီဗို (၄၃ မှတ်) ပြီးရင် လာလီဂါ သမိုင်းမှာ တန်းဆင်းခဲ့ရတဲ့ အသင်းတွေထဲ ရမှတ် အများဆုံး မှတ်တမ်း ဖြစ်လာခဲ့ပါတယ်။
မာယော့ကာ အတွက် စိတ်သက်သာရာရစရာ တစ်ခု ကတော့ နောက်ဆုံး ပွဲစဉ်မှာ ဗီဒတ် မူရီကီ ဂိုးသွင်းယူနိုင်ခဲ့ပါတယ်။ ဒါကြောင့် ဒီရာသီ သွင်းဂိုး ၂၃ ဂိုးနဲ့ ရွှေဖိနပ်ဆု ပြိုင်ပွဲမှာ ကီလီယန် ဘာပေ (၂၅ ဂိုး) ရဲ့ နောက် ဒုတိယနေရာမှာ ရပ်တည်နိုင်ခဲ့တာပဲ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
